Самарқанд вилояти Жомбой туманидаги клей ишлаб чиқариш цехида 16 ноябрь куни ёнғин содир бўлди. Бу ҳақда вилоят Фавқулодда вазиятлар бошқармаси ахборот хизмати «Bugun.uz»га хабар берди.

Маълум қилинишича, соат 12:44 да Назар МФЙ ҳудудида жойлашган клей ишлаб чиқариш цехида ёнғин содир бўлаётгани тўғрисида туман фавқулодда вазиятлар бўлимига хабар келиб тушган. Шунга кўра, 6 та ёнғин-қутқарув экипажи воқеа жойига соат 12:55 да етиб бориб, ёнғин соат 14:50 да қуршаб олинган ва соат 15:51 да бартараф этилган.

Ёнғин оқибатида цехнинг тахминан 400 квадрат/метр майдонда томи, шифти ва ички қисмида клей махсулотлари ёниб зарарланган. Ҳодиса оқибатида жабрланган ва ҳалок бўлганлар йўқ. Ҳозирда ёнғиннинг келиб чиқиш сабаби ва моддий зарар миқдори аниқланмоқда.  

«Юқоридаги каби кўнгилсиз вазиятларнинг олдини олиш мақсадида Фавқулодда вазиятлар вазирлиги фуқаролардан ёнғин хавфсизлиги қоидаларига қатъий риоя этишни сўраб қолади», дейилади хабарда.

Аввалроқ Фарғонада резина плитка цехи ёниб кетганди. Шунингдек, Тошкент вилоятида мебель дўкони ёниб кетгани хабар қилинган.