«Толибон» ҳаракати бир масалада ваъда бергани маълум бўлди
«Толибон» ҳаракати Афғонистондаги буддистлар меросини ҳимоя қилишга ваъда берди. Бу ҳақда «Sputnik Афғонистон» маълум қилди.
Таъкидланишича, бу бўйича Маданият ва ахборот вазирлиги қошидаги археология бўлими бошлиғи Забиҳуллоҳ Садат маълумот берган. Унинг сўзларига кўра, мамлакатдаги тарихий обидалар, шу жумладан, Будда ҳайкаллари ҳимоя ва реконструкция қилинади. Шунингдек, уларни ҳаракатнинг махсус бўлинмаси қўриқлайди.
Қайд этилишича, «Толибон» ҳаракати ёдгорликларни реконструкция қилиш бўйича хорижий таклифларни ҳам кўриб чиқишга тайёр.
Маълумот ўрнида, «Толибон» ҳаракати Афғонистонда аёллар ҳуқуқини ҳурмат қилишга ва уларга ўқиш ҳамда ишлаш имкониятини яратишга ваъда берганди. Ҳаракат вакили Забиҳуллоҳ Мужоҳиднинг сўзларига кўра, мамлакатда инсон ҳуқуқлари, жумладан, аёллар ва болалар ҳуқуқи ислом динига мувофиқ ҳимоя қилинади.
«Биз бунга ваъда берамиз, лекин бошқа давлатлар ва ташкилотлар бизга босим ўтказмаслиги керак, чунки биз ҳали ҳам қоидалар ишлаб чиқяпмиз, тизимни қайта қурмоқдамиз. Шундай экан, давлатимизни тан олмайдиганлар бизга босим ўтказиб, нима қилиш кераклигини ҳал қилмасин. Лекин биз жаҳон ҳамжамиятини инсон ҳуқуқларини ҳурмат қилишга ва тўғри йўналишда ҳаракат қилишимизга ишонтирамиз. Келгусида уларнинг хавфсизлигига жавоб берамиз ва инсон ҳуқуқлари ҳурмат қилинишини таъминлаймиз», — деган ҳаракат вакили.
Унинг сўзларига кўра, Афғонистондаги аёллар таълим олиш ҳуқуқига эга, шунингдек, муайян қоидаларга риоя қилган ҳолда ишлаши мумкин.
«Толибон» ҳаракати Афғонистон халқ қўшиқчисини ўлдиргани ҳақида хабар берилганди. Шунингдек, ҳаракат Ғазни вилояти радиосида аёлларнинг ишлашини тақиқлагани маълум қилинган.
