Германияда аҳоли орасида Ангела Меркель сабаб можаро юзага келгани маълум қилинди. Бу ҳақда «Spiegel» хабар берди.

Маълум қилинишича, Ангела Меркель Германия канцлери лавозимини тарк этгач, унинг идорасида тўққиз киши ишлайди, молиялаштириш эса Мудофаа вазирлигидаги фойдаланилмаётган лавозимлар ҳисобидан таъминланади. Идора раҳбари ва унинг ўринбосари 10,4 минг евро маош олади. Шунингдек, бюрода иккита ёрдамчи, котиба ва ҳайдовчи ишлайди.

Газетанинг қайд этишича, аввалроқ Германия собиқ канцлери ва президенти бюросининг фаолиятини молиялаштириш танқидга сабаб бўлган. 2019 йилда Бундестаг бюджет қўмитаси бундай бюролар ходимларини давлат бюджетидан тўланадиган 5 та лавозим билан чеклаш учун овоз берган.

«Меркель хоним ўзини ҳар доим камтарин канцлер сифатида кўрсатиб келган. Шубҳасиз, бу тугаганга ўхшайди. Бўлажак бюросининг мўл-кўл жиҳозлари эса канцлер ‘соя’даги бўлимни яратмоқчи деган таассурот уйғотади. Ходимларнинг ҳаддан ташқари кўплигини тушунтириб бўлмайди», дейилади хабарда.

Маълумот ўрнида, Меркель 15 минг еврога яқин пенсия олиш учун ариза топширгани хабар қилинган. Бу миқдор 1990 йилдан бери мунтазам равишда Бундестаг депутати этиб сайлангани, Гелмут Кол ҳукуматида параллель равишда ишлагани, кейин эса қисқа муддат мухолифатдан сўнг 16 йил давомида канцлер бўлганини ҳисобга олиб белгиланган.

Аввалроқ Германия президенти Ангела Меркелдан канцлер лавозимида қолишни сўрагани ва Меркель истеъфога чиққач, қаерда яшамоқчилиги маълум қилинган.