Россиянинг Санкт-Петербург шаҳрида 50 ёшли ўзбекистонлик эркак аввал ўзи билан бирга яшаган аёлга таҳдид қилди. Бу ҳақда ҳуқуқ-тартибот идораларидаги манбасига таяниб, «Невские новости» хабар берди.

Таъкидланишича, аёл 50 ёшли ўзбекистонлик эркак билан 2021 йил февраль ойида ажрашган. Бироз вақт ўтгач, Ўзбекистон фуқароси собиқ севгилиси ва у билан юрган эркакни таъқиб қила бошлаган. Бунга қўшнилар, танишлар гувоҳ бўлган.

Қайд этилишича, аёл полицияга қилган шикоятида телефонига таҳдидли хабарлар келаётганини, шахсий суратлари эса ижтимоий тармоқларга жойланаётганини айтган. Келтирилишича, ўзбекистонлик эркак бир неча марта аёлнинг ишдан келишини кутиб турган ва уни машинада бирга кетишга мажбурлаган. 

Маълум қилинишича, аёл полицияга мурожаат қилиб, уни бир неча бор ўлдириш билан қўрқитган ўзбекистонлик эркакни жиноий жавобгарликка тортишни сўраган.

Аввалроқ Россияда ўзбекистонлик эркак маҳаллий фуқарога пичоқ билан таҳдид қилгани хабар берилганди. Шунингдек, халқаро қидирувда бўлган ўзбекистонлик эркакнинг Россияда қўлга олингани маълум қилинган.