АҚШ разведка бошқармаси бошлиғи Путинни кузатишдаги қийин пайтни маълум қилди
АҚШ Мудофаа вазирлигининг разведка бошқармаси бошлиғи Скотт Беррье Путинни кузатиш давомидаги энг қийин пайтни маълум қилди. Бу ҳақда у «CBSN» телеканалига берган интервьюсида гапирди.
Унинг сўзларига кўра, америкалик разведка ходимларига Россия президенти Владимир Путиннинг кейинги ҳаракатларини башорат қилиш баъзан қийинчилик туғдиради.
Қайд этилишича, Беррье Россияни АҚШ учун иккинчи рақамли таҳдид деб билишини, бу борада Хитой давлати биринчи ўринда туришини айтган.
«Ўзимизни алдамайлик, Россия — таҳдид. Чунки уларда тўлиқ ядро учлиги (стратегик авиация, ядровий сувости кемалари, қитъалараро ракеталар) бор. Айнан шу қуроллар уни таҳдидга айлантиради. Биз эҳтиёт бўлишимиз керак, чунки Владимир Путиннинг кейинги ҳаракатларини баъзан тушиниш қийин», — деган Скотт Беррье.
Аввалроқ АҚШ разведкаси қайси давлат раҳбарини кузатишда муаммога дуч келаётгани маълум бўлганди. Шунингдек, АҚШ разведкаси коронавируснинг келиб чиқиши ҳақидаги ҳисоботни ошкор қилган.
