Пентагон Украина ва Россия чегараси ҳақида маълумот берди
АҚШ Мудофаа вазирлиги Украина ва Россия чегараси ҳақида маълумот бериб, Россия президенти Владимир Путин нима режалаштирганини аниқ билмаслигини маълум қилди. Бу ҳақда «Униан» хабар берди.
АҚШ мудофаа вазири Ллойд Остиннинг сўзларига кўра, Пентагон Украина чегарасидаги вазиятни диққат билан кузатмоқда. Вазирлик раҳбари Россияни «ўз ҳаракатларида шаффофроқ бўлишга», шунингдек, Донбасс бўйича Минск келишуви бажарилишини таъминлаш чорасини кўришга чақирган.
«Украина билан чегарада кучлар тўпланишига келсак, биз бу вазиятни диққат билан кузатиб борамиз. Путин қандай режани амалга ошираётганини аниқ билмаймиз, аммо бу қўшинлар ҳаракати, албатта, эътиборимизни тортмоқда», — деган у.
Аввалроқ Украина чегараси яқинида Россия қўшинлари тўплангани ва АҚШ Россияга қарши янги ҳарбий машғулот бошлагани маълум қилинган.
