Наманган вилояти Чуст туманида 15 ноябрь куни ҳайдовчи бошқарувни йўқотиши оқибатида «Matiz» автомашинаси «Damas» билан тўқнашди. Бу ҳақда вилоят Ички ишлар бошқармаси хабар берди.

Маълум қилинишича, ҳодиса соат тахминан 15:50 да Чуст–Каркидон йўлида содир бўлган. Чуст туманида яшовчи 38 ёшли фуқаро «Matiz» русумли автомашинасини бошқариб бораётиб, ҳаракат хавфсизлигини таъминлай олмаган. Оқибатда қарама-қарши йўналишда ҳаракатланиб келаётган, шу туманда яшовчи 33 ёшли фуқаро бошқарувидаги «Damas» русумли автомашина билан тўқнашган.

Қайд этилишича, воқеа оқибатида «Matiz» русумли автомашина ҳайдовчиси оғир тан жароҳати олиб, воқеа жойида ҳалок бўлган. «Damas» русумли автомашина ҳайдовчиси бош мия чайқалиши, бош мия ёпиқ шикасти ташхиси билан шифохонага ётқизилган.

Ушбу ҳолат бўйича Чуст туман Ички ишлар бошқармаси ҳузуридаги тергов бошқармаси томонидан Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.

Аввалроқ Тошкентда «Lacetti» симёғочга урилиб, ёниб кетганди. Шунингдек, Қашқадарёда ҳайдовчининг бошқарувни йўқотиши сабаб «Lacetti» бетон тўсиққа урилган.