АҚШ президенти Жо Байденнинг ўғли Хантер Байденга алоқадор инвестиция фирмаси Хитой компаниясига Конгода жойлашган дунёдаги энг бой кобальт конларидан бирини сотиб олишга ёрдам берди. Бу ҳақда «The New York Times» хабар қилди.

Маълум қилинишича, харидор Хитойнинг «China Molybdenum» компанияси бўлиб, у Марказий Африка мамлакатидаги энг йирик кобальт ишлаб чиқарувчилардан бири бўлган «Tenke Fungurume Mining» компаниясининг 80 фоиз улушини олган. Битим BHR (Bohai Harvest RST Shanghai Equity Investment Fund Management Co Ltd) томонидан амалга оширилган.

Компания хитойлик ҳамкорлар билан бирга 2013 йилда кичик Байден ва яна икки америкалик томонидан ташкил этилган. Қўшма Штатларнинг уч фуқароси директорлар кенгашига аъзо бўлган ва BHR’нинг 30 фоизини назорат қилган.

Ўз навбатида, 2021 йилда Байден маъмурияти Хитой ўзининг кобальт қазиб олиш бўйича устун мавқеидан фойдаланишини айтган ва Америка автомобиль саноатининг электр транспорт воситаларини ишлаб чиқариш учун қайта жиҳозланишига тўсқинлик қилишидан огоҳлантирган. Таъкидланишича, Оқ уй мазкур маълумотга муносабат билдириб, Байденнинг ўғли ва Хитой компаниясига алоқадор келишув юзасидан салбий жавоб қайтарган.

Аввалроқ Байден навбатдаги президентлик сайловида ҳам иштирок этиши маълум қилинганди. Шунингдек, Жо Байденда тиббий кўрик давомида бир нечта касаллик аниқланганди.