Буюк Британиянинг Чешир шаҳрида яшовчи 35 ёшли Жемма Робертс коронавирусга қарши эмланишни рад этиб, 8 та клиник ўлимни бошидан ўтказди. Бу ҳақда «The Mirror» хабар берди.

Маълум қилинишича, бир неча бора коронавирусга қарши эмланишдан бош тортган Жемма 2021 йилнинг август ойида касалликни юқтириб олган. Касалхонага ётқизилгандан сўнг шифокорлар аёлда коронавирус инфекциясининг оғир даражасини қайд этган ва уни сунъий нафас олдириш қурилмасига улашга мажбур бўлган.

Кўп ўтмай беморнинг юраги касалликни кўтара олмай қолган. Сунъий нафас олдириш қурилмасида ўтказган 2 ой ичида Жемма жами саккизта клиник ўлимни бошдан кечирган. Бироқ шифокорлар ҳар сафар уни сақлаб қолишга муваффақ бўлган. «Шифокорлардан ўлишимга йўл қўймаслигини сўраганим эсимда. Тиббиёт ходимлари менинг ҳаётимни сақлаб қолди. Энди уларнинг ҳамма айтганини бажараман», — дейди Жемма.

Таъкидланишича, сўзининг якунида Жемма эмлашдан бош тортгани оқибатида оиласи бошдан кечирган вазиятдан жуда афсусда эканини айтган ва барчани ўз ҳаётини хавф остига қўймасдан, ўз вақтида эмланишга чақирган.

Аввалроқ АҚШда эмланишга қарши бўлган амалдор коронавируcдан вафот этганди. Шунингдек, Португалияда эмланишга қарши бўлган оиланинг 3 аъзоси вирусдан вафот этгани ҳақида хабар берилган ҳамда эмланишга қарши чиққан америкалик радиобошловчи коронавирусдан вафот этгани айтилган.