Украина, АҚШ ва Британия разведка идоралари Россия қўшинларининг Украина чегаралари яқинида тўплангани ҳақида маълумот алмашди. Бу ҳақда Украина мудофаа вазири Алексей Резниковга таяниб, «РЕН ТВ» хабар берди.

Маълум қилинишича, Резников чегарадаги вазиятни муҳокама қилиш учун Вашингтонга борган. «Мен Буюк Британия мудофаа вазири Бен Уоллес ва АҚШ Давлат котиби Энтони Блинкен билан иккита муҳим учрашув ўтказдим. Жиддий суҳбатлар ўтказдик, бизнинг разведка идораларимиз маълумот алмашди. Мулоқотда хулосамиз бир хил бўлди. Бизга хавф режими тушунарли», — деган Резников.

Шунингдек, у АҚШ ҳам, Буюк Британия ҳам Украина «Россия агрессияси» билан ёлғиз қолмаслигига аниқ ваъда берганини таъкидлаган. Бундан ташқари, Ғарб давлатлари аллақачон NATO доирасида Россияга қарши курашиш бўйича маслаҳатлашувларни бошлаб юборган. Резниковнинг сўзларига кўра, Россия президенти Владимир Путин Москвага ташрифи чоғида АҚШнинг «жиддий амалдори»нинг ҳаракатларидан огоҳлантирилган. Ғарб Россиянинг ҳаракатларига иқтисодий ва сиёсий санкциялар билан жавоб бериши, шунингдек, Украинага ҳарбий ёрдамни ошириш ниятидалиги айтилган.

Аввалроқ АҚШ разведкаси Россия Украинага қачон ҳужум қилишини айтганди. Шунингдек, Пентагон Украина ва Россия чегараси ҳақида маълумот берганди.