Шимолий Корея ядро реакторини ишга туширганликда айбланди
Шимолий Кореянинг ядро реакторини ишга туширганига ишора қилувчи сунъий йўлдош тасвирлари эълон қилинди. Бу ҳақда «38 North» хабар берди.
Келтирилишича, Шимолий Корея Йонбен ядровий тадқиқот маркази мажмуасида плутоний ядровий ишлаб чиқариш реакторини ишлатмоқда. Нашр эътиборни 5 мегаватт қувватга эга реакторнинг генератор хонасидан чиқадиган буғга қаратган. Қайд этилишича, бу генераторлардан камида биттаси ишлаётганидан далолат беради. Бу каби реактор йилига олти килограммгача плутоний ишлаб чиқариши мумкинлиги айтилган. Бундан ташқари, сув ёрдамчи қувурдан Курен дарёсига олиб борувчи каналга оқишда давом этаётгани қайд этилган.
Аввалроқ Шимолий Корея Япон денгизига қисқа масофали ракета учиргани ва учта давлат Шимолий Кореяни ядровий дастурдан чиқаришга келишиб олгани маълум қилинган.
