Чехиянинг «Zuri» компанияси вертикал учиш ва қўниш функциясига эга учар такси прототипини синовдан ўтказишни бошлади. Бу ҳақда «New Atlas» хабар берди.

Маълум қилинишича, учар таксида электр узатиш ва водород ёқилғиси бирлаштирилган. У соатига 320 километр тезликда 720 километргача парвоз қилади. Агар таксининг оғирлиги камайтирилса ёки қуввати оширилса, у узоқроқ масофага уча олиши таъкидланган. Бироқ шу ҳолатида ҳам у Париждан Лондонга ёки Римдан Цюрихга парвоз қилиши айтилган. Такси тўрт кишилик бўлиб, машинанинг учиш ва қўниш мосламаларини қувватлантириш учун батареялардан фойдаланилади.

Аввалроқ АҚШда ҳарбийлар учун учар ликопча синовдан ўтказилганди. Шунингдек, Франциянинг самолёт ишлаб чиқарувчи компанияси учар таксини тақдим этганди.