Қирғизистонда гиёҳванд моддаларнинг ноқонуний айланмасига қарши курашиш хизмати ходимлари мамлакатга Ўзбекистон ва Тожикистондан гиёҳванд моддаларни етказиб бериш шуғулланган гуруҳни аниқлади. Бу ҳақда «Knews» хабар берди.

Маълум қилинишича, ўзбекистонлик эркак Жалолобод вилоятининг Мамай қишлоғида қўлга олинган. Жараёнда умумий оғирлиги тахминан 7 килограмм бўлган каннабис қатрони аниқланиб, мусодара қилинган. Яна бир гумонланувчи Бишкек яқинидаги айланма йўлда ушланган. Аниқланишича, Боткен вилоятида туғилган С.И.нинг машинасида оғирлиги тахминан 9 килограмм бўлган гиёҳванд модда топилган. Кейинчалик жиноят ишига алоқадор яна бир фуқаро Д.И. қўлга олинган. Унинг ёнидан топилган каннабиснинг умумий оғирлиги 16 килограммни ташкил қилган.

Мамлакат Ички ишлар вазирлиги матбуот хизмати хабарига кўра, мазкур ҳолат юзасидан Жиноят кодексининг 267-моддаси (гиёҳвандлик воситалари, психотроп моддаларни ва уларнинг аналогларини ўтказиш мақсадида қонунга хилоф равишда тайёрлаш) билан жиноят иши қўзғатилган.

Аввалроқ одам ўлдиргани учун қидирувда бўлган ўзбекистонлик эркак Қирғизистонда ушланганди. Шунингдек, мамлакатда «Ҳизб ут-Таҳрир» ташкилотининг ўзбекистонлик етакчиси қўлга олинганди.