Тошкентдан Наманганга учган самолёт аэропортга қўнмай, ортига қайтиб келди
Тошкентдан 28 ноябрь куни Наманган вилоятига учган самолёт вилоят аэропортига қўнмай, ортига қайтиб келди. Бу ҳақда «Tashkent_SkyNews» Telegram канали хабар берди.
Маълум бўлишича, самолёт «Ўзбекистон ҳаво йўллари» авиакомпаниясининг HY-095 Тошкент–Наманган рейси бўйича учган. Воқеага Наманган аэропортидаги ноқулай об-ҳаво шароити сабаб бўлган.
Қайд этилишича, ҳудудда қуюқ туман сабаб горизонталь кўриниш 50 метргача, вертикаль кўриниш эса 100 метргача қисқарган. Об-ҳаво шароити туфайли HY-096 Тошкент–Наманган рейси ҳам кечиктирилган.
Аввалроқ Қирғизистон самолёти Тошкент аэропортига фавқулодда қўнганди. Шунингдек, Тошкентда об-ҳаво сабаб қатор авиақатновлар кечиктирилгани бўйича қўшимча маълумот берилган.
