Янгиликлар - 14:52 · 29.11.2021

Эрон генерали Исроилни йўқ қилиш билан таҳдид қилди

Эроннинг қуролли кучлари матбуот котиби генерал Абулфазл Шекарчи мамлакатнинг асосий мақсади Исроилни йўқ қилиш эканини айтди. Бу ҳақда «i24news» хабар берди.

Фото: «Mehr News Agency»

Маълум қилинишича, Шекарчи мамлакат бу мақсаддан воз кечмоқчи эмаслигини айтган. Бундан ташқари, генерал Бирлашган Араб Амирликлари, шунингдек, Баҳрайннинг Исроил билан муносабатларни нормаллаштириш ҳақидаги қарорини кескин танқид қилган. Генерал уларнинг позициясини Ислом Республикаси учун «чидаб бўлмас» деб баҳолаган.

Шекарчининг таъкидлашича, энди Эрон бу давлатларни «сионистик режим»нинг бир қисми сифатида қабул қилади. «Биз дунёдаги сионизмни йўқ қилмоқчимиз», — дея қўшимча қилган у.

Аввалроқ Фаластиндаги Ҳамас гурухини Эрон молиялаштириши маълум қилинганди. Шунингдек, Эрон душманларни огоҳлантириш мақсадида ҳарбий машқлар ўтказиши хабар берилган.