Наманганда «кўчат экканлар» лавозимидан озод этилди — видео
Наманган вилояти Поп туманида 26 ноябрь куни Санг қишлоғи Боғ кўча маҳалла фуқаролари йиғини раиси бошчилигида кўчат экиш жараёнига сохталик билан ёндашилгани аниқланди. Бу ҳақда Экология қўмитаси хабар берди.
Маълум қилинишича, ҳолат юзасидан Боғ кўча маҳалла раиси Очилдиев Қаҳрамон Абдубаннонович, маҳалла раисининг ободонлаштириш, томорқа ва тадбиркорлик масалалари бўйича ўринбосари ҳамда ушбу ҳудудга боғланган маҳалла ҳамда оилани қўллаб-қувватлаш бўлими масъул ходими Акбаров Мансуржон Роҳаталиевичга тегишли чора кўрилган ва лавозимларидан озод қилинган.
Шунингдек, маҳаллада олиб борилган кўчат экиш ишларини назоратга олмагани учун туман маҳалла ва оилани қўллаб-қувватлаш бўлими бошлиғи Асқаров Эркинжон Маҳмуталиевичга ҳайфсан эълон қилинган.
Аввалроқ Ўзбекистондаги 12 та туман ҳокими кўчат экиш ишлари бошланмагани учун қатъий огоҳлантирилганди. Шунингдек, республикада йилига 200 миллион туп дарахт ва бута кўчатларини экиш режалаштирилганди.
