Янгиликлар - 16:55 · 29.11.2021

Қирғизистон президенти қамоқдаги депутатликка номзодга овоз берди

Қирғизистон президенти Садир Жапаров Жогорку Кенеш депутатлигига 28 ноябрь куни бўлиб ўтган сайловда қамоқдаги Равшан Жеенбековга овоз бергани маълум бўлди. Бу ҳақда «24.kg» хабар берди.

Фото: Akipress»

Маълум қилинишича, давлат раҳбари бугун ижтимоий тармоқларда пост эълон қилган. У нима учун ҳозир ҳибсда сақланаётган номзодга овоз берганини тушунтирган.

«Кўпчилик дўстларим ва танишларим менга савол беришмоқда, баъзилари эса уларга эмас, Равшан Жеенбековга овоз берганимдан хафа. Ҳа. Мен ҳибсдаги номзод Равшан Жеенбековга овоз бердим. Унинг айбдор ёки йўқлигини суд ҳал қилади. Ҳеч биримизнинг уларнинг ишларига аралашишга ҳақимиз йўқ. Бундан буён тизим ва қонунлар аниқ ишлаши керак. Қирғизлар бунга кўникиши керак. Нега Равшан Жеенбековга овоз берганимга келсак. Маҳбуслар айбдорми ёки йўқми, улар бахтсиз. Уларга ачинаман. Мен 2017 йилда қамоқда бўлганим каби, Равшан Жеенбеков ҳам ҳибсда. Мен ҳам 2017 йилги президентлик сайловида қатнашиш учун ариза топширгандим. Аммо Атамбаев ўша сайловларда иштирок этишимга рухсат бермади. Равшан эса иштирок этмоқда. Агар у сайловда ғалаба қозонса, озодликка чиқади, деган фикрга келдим. Бошқа ҳеч қандай сир йўқ. Сиёсийлаштиришга ҳожат йўқ. Ахборот бюллетеним журналистлар томонидан суратга олинишини билсам, ҳушёрроқ бўлардим», — дея изоҳ берган Жапаров.

Аввалроқ Қирғизистонда 3 нафар депутатликка номзод давлат тўнтаришида айбланиб қўлга олинганди. Шунингдек, Қирғизистонда 5 та партия сайлов натижаларини тан олишдан бош тортганди.