Эрдўғон Путин билан гаплашмоқчилиги маълум қилинди
Туркия президенти Ражаб Тоййиб Эрдўғон 3 декабрь куни Россия президенти Владимир Путин билан телефон орқали музокара ўтказишни режалаштиргани маълум қилинди. Бу ҳақда «РИА Новости» хабар берди.
Маълум қилинишича, Эрдўғоннинг ушбу режаси ҳақида Туркия ташқи ишлар вазири Мевлут Чавуш ўғли NАТО ташқи ишлар вазирлари йиғилишида очиқлаган. Унинг сўзларига кўра, икки давлат раҳбари Россия ва Украина ўртасидаги муносабатлар борасида гаплашади.
«Туркия Украинадаги вазиятни юмшатиш тарафдори. Биз икки томон — Россия ва Украина билан алоқадамиз. 3 декабрь куни президент Путин билан музокаралар ўтказмоқчи», — дея таъкидлаган Туркия ташқи ишлар вазири.
Эслатиб ўтамиз, аввалроқ Туркия минтақада юзага келиши мумкин бўлган можарони ҳал қилишда Россия ва Украина ўртасида воситачи бўлишга тайёр экани маълум қилинганди. Таъкидланишича, Туркия президенти Ражаб Тоййиб Эрдўғон музокараларда учинчи томон сифатида қатнашиш истагини билдирган. «Биз бу музокарани Украина билан ҳам, Россия президенти Владимир Путин билан ҳам ривожлантирамиз, бу масалани ҳал қилишда иштирок этишни истаймиз», — деган Эрдўғон.
Туркия президентининг сўзларига кўра, мамлакат учун минтақада тинчлик ўрнатилиши муҳим ҳисобланади. Чунки «қрим турклари» (қрим-татар халқи)нинг тақдири мамлакат учун асосий хавотирлардан бирига айланган.
Қайд этилишича, Эрдўғоннинг баёноти NАТО ва баъзи украиналик сиёсатчиларнинг Россияни Украинага қарши ҳарбий операцияга тайёрлаганликда айблагани фонида берилган. Россия–Украина чегарасида Россия қуролли кучларининг тўплангани ҳақидаги хабарлар октябрь охирида Америка матбуотида пайдо бўлган, кейинроқ Москванинг чегарадаги «ноодатий фаоллиги» Пентагон томонидан тасдиқланган. Аммо Кремль бу маълумотни рад этган.
Аввалроқ АҚШ разведкаси Россия Украинага қачон ҳужум қилишиниайтганди. Шунингдек, Пентагон Украина ва Россия чегараси ҳақида маълумот берганди.
