Ўзбекистонда ОИВга чалинган аёллардан йилига қанча чақалоқ туғилаётгани айтилди
Ўзбекистонда ОИВ инфекцияли аёллардан ҳар йили ўртача 550–600 нафар чақалоқ туғилмоқда. Бу ҳақда АОКАда Санитария-эпидемиологик осойишталик ва жамоат саломатлиги хизмати, Республика ОИТСга қарши кураш маркази мутасаддилари иштирокида ўтказилаётган матбуот анжуманида маълум қилинди.
Қайд этилишича, 2006 йилдан бошлаб ЖССТнинг тавсияларига мувофиқ ОИВ инфекциясининг онадан болага юқишининг олдини олиш дастури жорий этилган. Унга кўра, ҳар йили ўртача 600 минг ҳомиладор ОИВ инфекциясига текширилади.
Хусусан, Ўзбекистонда ОИВ инфекцияли аёллардан туғилган чақалоқларга ОИВ инфекциясининг онадан болага ўтиши олдини олиш мақсадида ретровирусга қарши дорилар ўз вақтида бериб борилади. Инфекциясининг онадан болага ўтишининг олдини олиш мақсадида туғилган чақалоқлар (6 ойликкача) сунъий озиқлантириш (қуруқ сут) билан таъминланади.
Аввалроқ Зангиотадаги ковид марказда йил бошидан бери қанча чақалоқ туғилгани маълум бўлганди.
