Россияда мигрантлардан бармоқ изини қайта-қайта топшириш талаб қилиниши мумкин

Россияга 90 кундан ортиқ муддатга келган мигрантлар ва чет эл фуқароларидан татуировка қилдирган ёки бирорта чандиғини олиб ташлаган бўлса, такрорий бармоқ изини топшириш ва суратга тушиш талаб қилиниши мумкин. Бу ҳақда Россия Ички ишлар вазирлигининг қонун лойиҳасига асосланиб, «ТАСС» хабар берди.

Қонун лойиҳасига кўра, анатомик тузилмаси ўзгарганда, масалан, қўли ёки бармоғи йўқолган (жароҳат олган) тақдирда мигрантлар қайта бармоқ изини олиш жараёнидан ўтказилади.

Қайд этилишича, Россияда 2021 йилнинг 29 декабридан бошлаб мигрантлар ва мамлакатга 90 кундан ортиқ муддатга кирувчи хорижликлар мажбурий бармоқ изи ва суратга олишдан ўтиши керак бўлади. Шундан сўнг улар тегишли ҳужжатни олади. Фамилияси, исми, отасининг исми, туғилган санаси ва жойи, жинси ёки фуқаролиги ўзгарган тақдирда ёки шу каби бошқа бирорта ҳолатда ҳужжатдаги ушбу маълумотлар шахсий мурожаат пайтида олинган маълумотларга мос келмаса, бармоқ изи ва суратга олиш такрорланиши мумкин.

Қонун лойиҳасида келтирилишича, Беларусь фуқаролари, 6 ёшгача бўлган чет элликлар, Россияга узоқ муддатда бўлиш учун келган дипломатлар мажбурий бармоқ изи ва суратга олишдан озод қилиниши мумкин.

«Бармоқ изини рўйхатга олиш ва суратга тушириш Беларусь, 6 ёшгача бўлган хорижий фуқароларга, Россияга хизмат вазифасини бажариши муносабати билан кирган халқаро (давлатлараро, ҳукуматлараро) ташкилотларнинг мансабдор шахсларига, шунингдек, уларнинг оила аъзоларига нисбатан амалга оширилмайди», дейилади ҳужжатда.

“Bugun.uz” янгиликларини “Telegram”да кузатиб боринг