Қашқадарё швилояти Қарши шаҳрида 6 декабрь куни «Howo» юк машинаси 86 ёшли эркак бошқарувидаги «Tico»ни судраб кетди. Йўл ҳаракати хавфсизлиги бош бошқармаси ҳолат юзасидан маълумот берди.

Кадр: Telegram / @yhxbb_uz

Қайд этилишича, Амир Темур кўчасида 1935 йилда туғилган Р.Р. «Tico»да ҳаракатланаётиб, ўзи билан бир йўналишда ён қаторда бўлган 1963 йилда туғилган М.Т. бошқарувидаги «Howo» юк автомобилининг йўлигa чиқиб кетиши оқибатида тўқнашув содир бўлган.

ЙТҲ оқибатида тан жароҳати олган фуқаролар йўқ. Ҳодиса юзасидан Қарши шаҳар ички ишлар органи фаолиятини мувофиқлаштириш бўлими йўл ҳаракати хавфсизлиги бўлими ходимлари томонидан суриштирув олиб борилмоқда.

«Барча ҳайдовчилардан йўлларда қоидаларга риоя қилишларини сўраймиз», дейилади Йўл ҳаракати хавфсизлиги бош бошқармаси хабарида.

Аввалроқ Тошкентда «Spark» ва «Lacetti» иштирокида ЙТҲ содир бўлгани ҳақида хабар берилганди. Шунингдек, пойтахтда машина юкхонасига ортилган бетон устунлар кабинага кириб кетгани айтилган.