Сурхондарё вилояти Денов туманида 7 декабрь куни тонгда «Indenim» савдо мажмуаси жойлашган бинода чақнаш содир бўлди. ФВВ Давлат ёнғин назоратини ташкил этиш бош бошқармаси бошлиғи Ўлмас Музаффаров ҳолат юзасидан расмий маълумот берди.

Кадр: ФВВ Давлат ёнғин назоратини ташкил этиш бош бошқармаси

Қайд этилишича, Мустақиллик кўчасида жойлашган «Indenim» масъулияти чекланган жамиятига қарашли бинода тонгги соат 3:55 да газ чақнаши содир бўлган. Ҳолатнинг тахмин қилинаётган сабаби савдо мажмуасида газ асбоб-ускуналаридан фойдаланиш қоидаларининг бузилиши ҳисобланади.

«Хавотирга ўрин йўқ, бунақа чақнаш ҳолатининг юз бериши асосан ҳозирги тахминга кўра, газ асбоб-ускуналарининг бузилиши оқибатида келиб чиққан. Оқибатда мажмуа атрофидаги бир нечта хонадонга ва ижтимоий соҳа объектларига, маиший хизмат кўрсатиш шохобчаларига зиён етган. 

Ҳозирги вақтда мазкур ҳолат юзасидан ҳукумат комиссияси тузилган. Воқеа жойида комиссия иш олиб бормоқда. Ҳозирда бахтсиз ҳодиса оқибатларини бартараф этиш борасида Фавқулодда вазиятлар вазирлиги, ички ишлар органлари, Миллий гвардия ва тегишли идора-ташкилотлар ходимлари ишламоқда», — дейди Ўлмас Музаффаров

Эслатиб ўтамиз, Денов шаҳридаги савдо мажмуасида 7 декабрь куни чақнаш юзага келганди. Фавқулодда вазиятлар вазирлиги ахборот хизмати ҳолат юзасидан қўшимча маълумот берган. Ҳодиса оқибатида 2 киши ҳалок бўлган, 9 нафар фуқаро жароҳат олган.

Мазкур ҳодиса сабаб ва оқибатларини ўрганиш учун бош вазирнинг биринчи ўринбосари Очил Раматов бошчилигидаги ҳукумат комиссияси воқеа жойида иш олиб бормоқда.