Ўзбекистон Глобал соғлиқ сақлаш хавфсизлиги индексида 195 мамлакат ичида 82-ўринни эгаллади.

Фото: «Bugun.uz»

Маълум қилинишича, рейтинг АҚШнинг «Nuclear Threat Initiative» нодавлат нотижорат ташкилоти экспертлари томонидан Жон Хопкинс университети саломатлик хавфсизлиги маркази ва «The Economist» журналининг таҳлилий маркази билан ҳамкорликда тузилган. Унда тадқиқотчилар 195 мамлакатдаги соғлиқни сақлаш тизимининг самарадорлигини таҳлил қилган ва уларнинг кенг кўламли пандемияларга тайёрлигини баҳолаган.

Таъкидланишича, индекс очиқ манбалардан олинган маълумотлар ва халқаро ташкилотлар маълумотларига асосланган. Марказий Осиё давлатлари орасида Тожикистон 140-поғона билан энг паст ўринни эгаллаган. Қозоғистон 55, Қирғизистон 68, Туркманистон эса 119-ўринда қайд этилган.

Рейтингда биринчи ўринни АҚШ эгаллаган. Кучли ўнталикдан Финляндия, Канада, Буюк Британия, Германия ва Жанубий Корея ўрин олган. Сомалининг соғлиқни сақлаш тизими пандемияга энг кам тайёр мамлакат бўлиб чиққан.

Мутахассисларнинг сўзларига кўра, кўплаб давлатлар соғлиқни сақлаш тизимини яхшилаган, аммо улар ҳали ҳам келажакдаги эпидемиялар ва пандемия таҳдидларига керакли даражада тайёр эмас.