Чеченистон раҳбари Рамзан Қодиров қизи Хадижат Қодировани «Чеченистон республикаси олдидаги хизматлари учун» медали билан тақдирлади. Бу ҳақда Чеченистон раҳбари администрацияси ва ҳукумат раҳбари Галас Таймасханов Instagram’даги саҳифасида маълум қилди.

Унинг сўзларига кўра, Қодирова мактабгача таълим тизимини ривожлантиришга қўшган ҳиссаси, виждонли меҳнати учун тақдирланган. Хадижат Грознийнинг мактабгача таълим бўлими бошлиғи этиб тайинланганидан сўнг 1 йил давомида бу соҳада катта ижобий ўзгаришлар юз берган.

Қайд этилишича, ушбу мукофот Чеченистон республикаси раҳбари Рамзан Қодировнинг фармони билан топширилади.

«Мен Хадижат Рамзановнани муносиб мукофот билан чин қалбимдан табриклайман ва унга Аҳмад Хожи ижодий йўлида Чеченистон республикасига хизмат қилишда янада муваффақиятлар тилайман», — дея қўшимча қилди Таймасханов.

Маълумот ўрнида, Чеченистон раҳбари Рамзан Қодировнинг бугунгача Чеченистон маданият вазирининг биринчи ўринбосари лавозимида ишлаган тўнғич қизи маданият вазири этиб сайланганди. Таъкидланишича, ўз ишига масъулиятли муносабатда бўлиш орқали Айшат Қодирова республика кутубхоналари, маданият уйлари ва театрлари ривожига улкан ҳисса қўшган, шунингдек, Маданият вазирлигининг барча соҳаларида юқори кўрсаткичларга эришган.

Айшат Қодирова 1998 йил 31 декабрда туғилган. У Чеченистон давлат университетини тамомлаган, 2016 йилдан буён «Firdavs» мода уйининг директори, 2020 йилнинг сентябридан Чеченистон маданият вазирининг биринчи ўринбосари лавозимида ишлашни бошлаган.

Аввалроқ Рамзан Қодиров ўзини Путиннинг «лойиҳаси» деб атагани маълум қилинганди. Шунингдек, унинг Нобель мукофотига номзод сифатида кўрсатилгани ҳақида хабар берилган.