Шавкат Мирзиёев 11 декабрь куни Тошкент шаҳри Мирзо Улуғбек туманидаги меҳнат таълимига ихтисослаштирилган мактабга ташриф буюрди. Бу ҳақда Президент матбуот хизмати хабар берди.

Фото: Президент матбуот хизмати

Маълум бўлишича, муассаса 1976 йилда қурилган бўлиб, 1 минг 178 ўринга мўлжалланган. Лекин бугунги кунда ўқувчилар сони бунга нисбатан кўп. Бино ва жиҳозлар ҳам эскирган.

Фото: Президент матбуот хизмати

Давлат раҳбари синфхоналар, спорт зали ва ошхонани кўздан кечирди. Мактаб учун янги бино қуриш, ёшларга ҳунар ўргатиш, амалиёт дарсларини корхоналарда ташкил этиш бўйича кўрсатмалар берди.

Фото: Президент матбуот хизмати

«Ҳамма жойда замонавий корхоналар очиляпти, инвестиция лойиҳалари амалга ошириляпти. Уларни юритадиган салоҳиятли кадрлар керак бизга. Шунинг учун ҳам муаллим ва мактабларга, таълим сифатини яхшилашга алоҳида эътибор беряпмиз. Салоҳиятли кадрлар рақобатни пайдо қилади. Қаердаки рақобат бўлса, ўша жойда ривожланиш бўлади», — деди Шавкат Мирзиёев.

Фото: Президент матбуот хизмати

Давлат раҳбари шу ерда оммавий ахборот воситалари вакиллари билан ҳам суҳбатлашди. Мулоқотда тиббиёт ва мактаб таълимини ривожлантиришга қаратилаётган эътибор, ҳоким ёрдамчилари фаолиятининг мазмун-моҳияти, уларнинг салоҳиятли кадрга айланиши, шу орқали катта кадрлар захираси шакллантирилиши ҳақида сўз борди.

Фото: Президент матбуот хизмати