Тошкент шаҳри Юнусобод туманида 10 декабрь куни автобус йўлнинг белгиланмаган қисмидан ўтаётган пиёдани уриб юборди. Бу ҳақда пойтахт Ички ишлар бош бошқармаси ахборот хизмати хабар берди.

Маълум бўлишича, воқеа соат 18:40 атрофида туманнинг Амир Темур кўчаси Минор метроси қаршисида содир бўлган. Аниқланишича, 31 ёшли Т.Ж. бошқарувидаги 72-сонли йўналиш автобуси йўлнинг белгиланмаган қисмидан ўтаётган пиёда Т.У.ни уриб юборган.

Оқибатда жабрланувчи олган жароҳатлари билан воқеа жойида ҳалок бўлган. Мазкур ҳолат юзасидан Тошкент шаҳар прокуратураси томонидан терговга қадар текширув ўтказилмоқда.

Аввалроқ Тошкентда йўловчи автобуси бекат ёнида турган 2 пиёдани уриб юборгани хабар қилинганди. Қайд этилишича, ҳайдовчи автобусни бошқариб бораётган вақтда олдинда кетаётган транспорт воситаси кескин тўхтаб қолган. Бунинг оқибатида ҳайдовчи автобусни ўнгга бурган ва бекат ёнида турган 2 пиёдани туртиб юборган.