Қорақалпоғистоннинг Тахтакўпир туманида 14 та кийикни ўлдириб, гўштини бўлаклаган браконьерлар қидирилмоқда. Бу ҳақда Давлат экология қўмитаси матбуот хизмати хабар берди.

Маълум қилинишича, экология соҳасидаги назорат инспекциясининг Қорақалпоғистон Республикаси Тахтакўпир туманида хизмат олиб бораётган ходимлари 12 декабрь куни Қўнғироткўл овул фуқаролар йиғини атрофидаги чўл ҳудудида 14 та кийикни отиб ўлдириб, гўштини бўлаклаётган браконьерларни ушлаш чораларини кўрган.

Инспекторлар яқинлашаётганини кўрган қуролланган овчилар кийикларнинг гўшти, шунингдек, кийим-кечалари, озиқ-овқатлари, ёнилғи маҳсулотлари ва ўқ-аслаҳаларини ташлаб, номаълум йўналишда давлат рақамисиз УАЗ русумли кулранг автомобилда қочиб кетган.

Улар қолдирган ашёлар ичида М.М. номига хориждан Т.М.дан 12 октябрь куни чет эл валютасида пул ўтказилганини тасдиқловчи квитанция топилган. Айни пайтда ҳуқуқни муҳофаза қилиш органлари билан биргаликда браконьерларни қўлга олиш чора-тадбирлари амалга оширилмоқда. Бу ҳақда қўшимча маълумот берилади.

Шунингдек, Қорақалпоғистон Экология қўмитаси матбуот хизмати ҳам ҳолат бўйича маълумот берди. Унга кўра, инспекторлар номаълум шахсларнинг 5 километр масофагача изидан борган. Улар давлат инспекторларидан қочиб кетишга улгурган.

Тахтакўпир тумани чўл зонасининг «Тасберген» кран атрофида инспекторлар томонидан номаълум шахслар турган жой кўздан кечирилганда воқеа жойидан уларга тегишли отилган патрон гилзаси, идиш-товоқ, хўжалик буюмлари бўлган пичоқ, болта, ёнилғи, қийим-бошлар ҳамда «Қизил китоб»га киритилган 14 дона жайрон, 5 дона ёввойи қуён ташлаб кетилгани аниқланган.

Давлат инспекторлари томонидан ушбу ҳолат юзасидан тегишли тартибда далолатнома тузилиб, воқеа жойи видеотасвирга олинган.

Аввалроқ Фарғонада ноқонуний овланган 100 килограмм балиқ болалар уйига топширилганди. Шунингдек, Қашқадарёда браконьерлар «Қизил китоб»га киритилган тоғ эчкисини отиб ўлдирган.