Коронавируснинг яна бир хавфли аломати маълум қилинди

Коронавирус организмнинг қаришини тезлаштириши маълум қилинди. Бу ҳақда «РБК» хабар берди.

Фото: «Korrespondent.net»

Маълум қилинишича, касалликнинг ушбу аломати ҳақида Россия Федерал тиббиёт-биология агентлиги раҳбари Вероника Скворцова Россия Фанлар академиясининг умумий йиғилишида очиқлаган. «Коронавирус қариш пайтида юз берадиган қайта қуришга ўхшаш жараёнларни қўзғатади ва тезлаштиради», — дейди Скворцова.

Унинг сўзларига кўра, ушбу ҳолат муносабати билан мутахассислар коронавирусга чалинганларни даволаш усулларини қайта кўриб чиқишлари керак.

Маълумот ўрнида, коронавируснинг энг хавфли аломати бу нафас қисиши ва у билан боғлиқ бўлган ҳолатлар экани маълум қилинганди. Келтирилишича, таниқли эксперт, Роспотребнадзор Марказий эпидемиология илмий-тадқиқот институти директорининг клиник-таҳлилий ишлар бўйича ўринбосари Наталья Пшеничная бу ҳақда маълумот берган. У мазкур аломат юзага келганда зудлик билан шифокорга мурожаат қилиш кераклигини таъкидлаган.

Қайд этилишича, дунё бўйлаб ковиднинг янги аломатлари ҳозирча аниқланмаган. Коронавируснинг барча белгилари 2020 йили маълум бўлган.

Аввалроқ ЖССТ коронавирус эпидемияси ўчоғига айланган ҳудудни маълум қилганди. Шунингдек, олимлар эмланишдан кейин ножўя таъсир юзага келишига нима сабаб бўлишини очиқлаганди.

Кўп ўқилган

Бошқа лойиҳаларимиз