Қирғизистонда Жогорку Кенешнинг халқаро ишлар, мудофаа ва хавфсизлик қўмитаси Ўзбекистонга элчи лавозимига тайинланадиган номзодларни кўриб чиқишни кун тартибидан олиб ташлади. Бу ҳақда «24.kg» хабар берди.

Маълум қилинишича, қўмита аъзолари мазкур қарорга изоҳ бермаган. Фарҳод Иминов Тошкентдаги дипломатик миссия раҳбари лавозимига номзод сифатида илгари сурилган. Бироқ Жогорку Кенеш сайтида бу масала қўмита йиғилиши бошланишидан олдин кун тартибидан олиб ташлангани маълум қилинган.

Таъкидланишича, 2015 йилда халқ депутати этиб сайланган ва орадан уч йил ўтиб, ўз лавозимини тарк этган «Республика-Ота Журт» фракциясининг парламентдаги собиқ депутати Фарҳод Иминовнинг номзоди ижтимоий тармоқ фойдаланувчиларининг салбий муносабатига сабаб бўлган. Қирғизистоннинг Ўзбекистондаги собиқ элчиси Иброҳим Жунусов парламент сайловларида иштирок этгани сабабли истеъфога чиққан.

Аввалроқ Қирғизистон аҳолиси мамлакатнинг Ўзбекистон билан муносабатларига баҳо берганди.