Олий Мажлис Қонунчилик палатасининг 16 декабрь кунги 22-ялпи мажлисида Тошкент шаҳар ҳокими Жаҳонгир Ортиқхўжаев Ғафур Ғулом боғини ободонлаштириш ишлари қайта кўриб чиқилишини маълум қилди.

Ортиқхўжаев шаҳар экологияси тўғрисидаги саволга жавоб бергач, Сенат раиси Танзила Норбоева Ғафур Ғулом боғи билан боғлиқ ишлар якунига етмагани, буни назоратга олиш кераклигини таъкидлади.

«Аввало, ҳар бир дарахт учун қайғураётган одамларимиз бор. Шунисига ҳам шукр! Бу ҳам давлатнинг ривожланаётганини билдиради. Илгари дарахт кесилса, ҳеч ким аҳамият бермасди. Мен фуқароларимизга миннатдорлик билдираман. Ҳокимлик ҳам буни эътиборсиз қолдирмайди. 

Ғафур Ғулом парки икки йил олдин инвесторга берилган. Бизга кўрсатган, Президентга кўрсатилган лойиҳасида ҳеч бир дарахтни кесмаслик, пляж зоналарини қолдириш, реконструкция қилиш ва қўшимча янги аттракционлар қуриш белгиланган эди. 

Лекин инвестор, мана, бир йилдан ошди, ўзига қўйилган вазифаларни бажармади. Мен буни қайта кўриб чиқишни таклиф қиламан. Буни қайта кўриб чиқамиз», — дея жавоб қайтарди Тошкент ҳокими.

Маълумот ўрнида Ғафур Ғулом боғи 2019 йил август ойида BMP Smart Decision компаниясига 49 йилга ижарага берилган. Компания инвеcтицион мажбуриятлари доирасида боғни жаҳон стандартларига жавоб берадиган қилиб қайта таъмирлаши, эскирган аттракционларни янгисига алмаштириши лозим.