Тожикистоннинг Хўжанд шаҳрида дизель ёнилғиси тақчиллиги сабабли автобуслар аҳолига хизмат кўрсатишдан тўҳтади. Бу ҳақда «Asia-Plus» хабар берди.

Фото: «Asia-Plus»

Маълум қилинишича, «Хўжанд шаҳар жамоат транспорти» ДУК директори Музаффар Раҳимхўжаев 17 ёки 18 декабрдан шаҳарнинг учта йўналиши бўйича 40 та автобус қатнови йўлга қўйилишини айтиб ўтган.

«Жамоат транспортларининг ҳаракатланмаслиги ёнилғи етишмаслиги билан боғлиқ, бироқ ёнилғи ишлаб чиқарувчи корхоналар билан келишиб олдик ва автобуслар 17 ёки 18 декабрдан ишга чиқади. Ёнилғини маҳаллий ҳукумат бюджетидан сотиб оламиз», — деган у.

Шу билан бирга, расмий корхонанинг етказиб берувчилардан қарзи борлигини, улар «Хўжанд шаҳар жамоат транспорти» ДУКнинг аввалги раҳбарларидан қолганини айтган. Таъкидланишича, бу ҳудуддаги жамоат транспорти узилишидаги биринчи ҳолат эмас. Жумладан, 2021 йилнинг август ойида дизель нархи ошиши сабабли автобусларнинг 90 фоизи ҳаракатланишдан тўхтаган. Улар бир ойдан кейин аҳолига хизмат қилишни бошлаган.

Аввалроқ Тожикистон ва Ўзбекистон ўртасида автобус қатнови тиклангани маълум қилинганди.