Вазирлар Маҳкамасининг «Тошкент шаҳар транспорти ва йўл-транспорт инфратузилмасини 2025 йилгача ривожлантириш концепциясини тасдиқлаш тўғрисида»ги қарорига мувофиқ Тошкент шаҳрида ягона дизайн асосида автобус оралиқ бекатлари қайта ташкил этилади.

Фото: «Bugun.uz»

Намунавий автобус оралиқ бекатларининг жорий этилиши натижасида йўловчиларга қуйидаги қулайликлар яратилади:

  • автобус оралиқ бекатлари ҳудудида имконияти чекланган йўловчилар тўсиқсиз ҳаракатланиши;
  • аҳоли учун интернет тармоғидан (Wi-Fi) фойдаланиш;
  • бекатларда электрон табло ўрнатиш орқали автобуслар қатнов жадвали ва келиш вақтини кузатиб бориш имконияти;
  • замонавий дизайндаги ва қулай бўлган ўриндиқлардан фойдаланиш;
  • мобил қурилмаларни қувватлаш учун манбалардан фойдаланиш;
  • бекатнинг автомобиль йўли қатнови қисми билан чегарасида «тактил» плиталар ўрнатиш йўли билан имконияти чекланган фуқаролар хавфсизлигини таъминлаш.

Қайд этилишича, бундай автобус оралиқ бекатларида савдо-маиший хизмат кўрсатиш шохобчаларини бекат ҳудудида жойлаштириш кўзда тутилмаган, бунда бекатнинг фақат пештоқи ва ён деворларида реклама учун экранларни жойлаштириш мумкин. Бунда автобус бекатлари жойлаштириладиган ер майдонлари электрон аукцион орқали тадбиркорларга 10 йил муддатга ижарага берилади ва тадбиркорга бекатларни доимо соз ва озода ҳолда сақлаш мажбурияти юкланади.

Қайд этилишича,«Ақлли бекат»ларда (SmartBus Stop) йўловчилар учун йўналишдаги транспорт воситалари (йўналиш рақамлари), уларнинг қатнаш оралиқ графиклари, маршрутдаги автобус қанча пайтда шу бекатга етиб келиши, об-ҳаво маълумотлари ва транспорт ҳаракати билан боғлиқ бўлган бошқа маълумотларни онлайн тарзда етказиб туриш ҳамда бекатларда бепул Wi-Fi тармоқларига уланиш, бекатга ўрнатилган IoT қурилмалари, жумладан, кузатув камералари орқали марказий диспетчерлик пунктига бекатдаги йўловчилар сони ҳақида маълумотларни етказиш, бу билан ўз навбатида маршрутдаги автобуслар сонини кўпайтириш/камайтириш бўйича тезкор қарорлар қабул қилиш имкониятини яратади.

Келтирилишича, Тошкент шаҳрида 2025 йилгача босқичма-босқич намунавий дизайн асосида 1160 та оралиқ бекат қуриб, фойдаланишга топширилиши учун 26 миллиард 680 миллион сўм сарфланади. Маблағлар шаҳар ҳокимлиги ҳисобидан ажратилади.

Аввалроқ Фарғонада «Ақлли бекат» лойиҳа ҳужжатларини тайёрлаб бериш учун пора олган мансабдор ушланганди. Шунингдек, Тошкент шаҳрига «яшил» автобуслар сотиб олиниши хабар қилинганди.