NATO Россия қўшинлари Украина чегараси яқинига жойлаштирилаётгани фонида ўзининг 40 минг кишидан иборат тезкор ҳаракат кучларини юқори тайёргарлик ҳолатига ўтказди. Бу ҳақда ташкилотнинг юқори мартабали дипломатига таяниб, «Die Welt» хабар берди.

Фото: «Associated Press»

Манбанинг сўзларига кўра, юқори шайликдаги Бирлашган ишчи гуруҳи инқироз минтақасига аввалгидек етти кун ўрнига беш кун ичида жойлашишга тайёр бўлиши керак. Шунингдек, махсус кучлар ва логистика бўлинмаси ҳам юқори тайёргарлик ҳолатига ўтказилган.

Қайд этилишича, NATO нафақат Россия ва Украина чегарасидаги вазият туфайли, балки Польша, Руминия, Латвия, Литва ва Эстониянинг ҳимоясини кучайтириш мақсадида ҳам жанговар тайёргарликни оширган.

«NATO иттифоқчилари Россиянинг ҳаракатлари шаффоф бўлиши, кескинликни камайтириши кераклигини таъкидламоқда. Ҳар қандай тажовуз муқаррар оқибатларга олиб келишини ҳам очиқ айтдик. ташкилотнинг Россияга нисбатан сиёсати изчиллигича қолмоқда: мудофаа ва мулоқот», — дейди ташкилот вакили.

Аввалроқ NATO Россия билан мулоқотга киришиш шартларини маълум қилганди. Шунингдек, АҚШ NATO’нинг Осиё версиясини ёки Хитойга қарши коалиция тузишни режалаштирмаётгани айтилганди.