Афғонистоннинг Мозори Шариф шаҳрида 23 декабрь куни Ўзбекистоннинг инсонпарварлик юкларини биродар Афғонистон халқига тантанали топшириш маросими бўлиб ўтди. Бу ҳақда Ташқи ишлар вазирлиги ахборот хизмати хабар берди.

Фото: Ташқи ишлар вазирлиги ахборот хизмати

Қайд этилишича, ун, гуруч, шакар ва бошқа озиқ-овқатлар, биринчи навбатдаги зарурий товарлар, кийим-кечаклар, тўқимачилик маҳсулотлари, умумий оғирлиги 4 минг тоннадан зиёд кўмир ёқилғисидан иборат ушбу инсонпарварлик ёрдами ўзбек халқининг Афғонистонга кўрсатган навбатдаги хайрихоҳлиги бўлган.

Фото: Ташқи ишлар вазирлиги ахборот хизмати

Маросимда сўзга чиққан Афғонистон муваққат ҳукумати ташқи ишлар вазири ўринбосари Шер Аббос Станикзай мамлакат учун оғир дамларда кўрсатилаётган доимий эътибор, қўллаб-қувватлаш ва бирдамлик учун Шавкат Мирзиёевга бутун афғон халқи номидан чуқур миннатдорлик билдирган.

Фото: Ташқи ишлар вазирлиги ахборот хизмати

Афғонистон халқига кўмак кўрсатиш чақирувига Ўзбекистон раҳбари биринчилардан бўлиб эътибор қаратгани, унинг сиёсатини кўп миллатли Афғонистон халқи чинакам инсонпарварлик, биродарлик ва яхши қўшничиликнинг чинакам ифодаси сифатида қаралаётгани алоҳида таъкидланган.

Фото: Ташқи ишлар вазирлиги ахборот хизмати

Аббос Станикзай афғон халқи Ўзбекистон раҳбарининг биродарлик муносабатини доимо ҳис қилиб келганини, шу боис мамлакатнинг янги ҳокимият идоралари яхши қўшничилик муносабатларини янада мустаҳкамлаш учун барча имкониятларни ишга солишини, шунингдек, ўз ҳудудидан қўшни давлатларга, жумладан, Ўзбекистонга ҳеч қандай таҳдидларга йўл қўйилмаслигини билдирди.

Балх вилояти ҳокими Қудратилла Абу Ҳамза мазкур инсонпарварлик ёрдами ўз вақтида кўрсатилаётгани, айни қиш фаслида афғон халқи учун алоҳида аҳамият касб этишини қайд этди. Унинг сўзларига кўра, бу икки биродар халқ ўртасидаги чуқур тарихий ва маънавий алоқаларнинг яна бир далилидир.

Маросимда сўзга чиққан Афғонистон жамоатчилиги вакиллари, жумладан, этник ўзбекларнинг таниқли арбоблари яна бир бор ўзлари учун энг оғир ва синовли дамларда эҳтиёж ва интилишларини ҳеч қачон унутмаган, афғон халқининг ҳамиша ҳақиқий дўсти бўлиб қолган Ўзбекистон раҳбарига ёрдами учун яна бир бор миннатдорлик билдирган.

Фото: АОКА Сурхондарё вилояти ҳудудий бошқармаси ахборот хизмати
Фото: АОКА Сурхондарё вилояти ҳудудий бошқармаси ахборот хизмати
Фото: АОКА Сурхондарё вилояти ҳудудий бошқармаси ахборот хизмати
Фото: АОКА Сурхондарё вилояти ҳудудий бошқармаси ахборот хизмати

Уларнинг фикрича, Ўзбекистон томонидан кўрсатилган бу ёрдам аслида мамлакатда оммавий очарчилик, оғир гуманитар ва озиқ-овқат инқирозининг олдини олишга хизмат қилади. Тадбир давомида ўзбекистонлик ошпазлар томонидан ўзбек палови пиширилиб, барча йиғилганлар, шунингдек, Афғонистон жамоатчилигининг кўплаб вакилларига тортиқ қилинган.

Аввалроқ Термиз шаҳри «Айритом» чегара пункти орқали Афғонистонга 63 та вагонда инсонпарварлик ёрдами жўнатилгани ҳақида хабар берилганди.