Қарши шаҳрида 17 декабрь куни ҳайдовчи машинасида 2 пиёдани уриб, воқеа жойидан қочиб кетди. Бу ҳақда вилоят Ички ишлар бошқармаси ахборот хизмати хабар берди.

Маълум бўлишича, воқеа соат 07:20 атрофида Қарши–Бишкент автомобиль йўлининг 4-километрида содир бўлган. Аниқланишича, «Lada Vesta» ҳайдовчиси светофорнинг қизил чироғида ҳаракатланган ва йўлни кесиб ўтаётган 2 пиёдани уриб кетган.

Шунингдек, қонунбузар ушбу ҳолатдан кейин воқеа жойидан яширинган. Оқибатда жабрланувчилардан бири шифохонага ётқизилган бўлса, бошқаси ҳалок бўлган. Мазкур ҳолат юзасидан ҳайдовчига нисбатан Жиноят кодексининг 266- моддаси (Транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми ҳамда 117-модданинг 2-қисми (Хавф остида қолдириш) билан жиноят иши қўғатилиб, ҳозирда суриштирув ҳаракатлари олиб борилмоқда.

Аввалроқ Тошкентда автобус йўлнинг белгиланмаган қисмидан ўтаётган пиёдани уриб юборгани хабар қилинганди. Аниқланишича, 31 ёшли Т.Ж. бошқарувидаги 72-сонли йўналиш автобуси йўлнинг белгиланмаган қисмидан ўтаётган пиёда Т.У.ни уриб юборган.