Самарқандда юк машинаси қисқа туташув оқибатида ёниб кетди — видео
ЙҲХББ ҳолат юзасидан маълумот берди
Самарқанд шаҳрида 26 декабрь куни юк машинсида қисқа туташув оқибатида ёнғин содир бўлди. Бу ҳақда Йўл ҳаракати хавфсизлиги бош бошқармаси ахборот хизмати хабар берди.
Маълум бўлишича, ҳодиса соат 04:00 атрофида шаҳар ҳудудидан ўтувчи М-39 автомобиль йўлининг 1079-километрида юзага келган. Аниқланишича, Тошкент–Самарқанд йўналиши бўйлаб ҳаракатланиб келаётган машинанинг юкхонасидаги музлатгичда қисқа туташув сабаб автомашина ёниб кетган. Ёнғин транспорт воситасининг кабина қисмига ҳам таъсир этган.
Оқибатда тан жароҳати олган фуқаролар бўлмаган. Ҳолат юзасидан Самарқанд шаҳар Йўл ҳаракати хавфсизлиги бўлими ходимлари томонидан суриштирув ишлари олиб борилмоқда.
Аввалроқ Тошкентда «Matiz» қисқа туташув оқибатида ёниб кетгани хабар қилинган. Шунингдек, Тошкентда «Lacetti» билан тўқнашган «Nexia» ёниб кетганди.
