Зеленский Украина конституциясининг 9 та моддасини бузганликда айбланди
Тегишли айблов мамлакат парламентида эшиттирилган
Украина парламентида мамлакат президенти Владимир Зеленский телеканалларга қарши санкциялар қўллаш орқали конституциянинг 9 та моддасини бузганликда айбланди. Бу ҳақда «РИА Новости» хабар берди.
Маълум қилинишича, тегишли айблов Олий Раданинг «Оппозиционная платформа – За жизнь» партияси депутати Юрий Загородний томонидан илгари сурилган. Зеленский аввалроқ Миллий хавфсизлик ва мудофаа кенгашининг «112 Украина», «NewsOne», «ZIK», «Первый независимый» ва «UkrLive.» телеканаллари брендларига эга бўлган 3 та компанияга нисбатан санкция киритганди.
«Первый независимый» ва «UkrLive.» телеканалларининг эгаси Украинанинг «Оппозиция платформаси — Ҳаёт учун» партияси сиёсий кенгаши раҳбари Виктор Медведчук, Олий Рада депутати, парламентнинг сўз эркинлиги бўйича қўмитаси раҳбари Нестор Шуфричнинг ҳамкори бўлган.
«Украина президентининг 2 телеканалга — ‘Первый независимый’ ва ‘UkrLive.’га қарши санкциялар қўллаш тўғрисидаги фармони мамлакатимиздаги қонунсизликнинг яна бир тасдиғидир. Кеча мен Зеленскийнинг фармонини ўқиганимда конституцияни очдим ва дарҳол 9 модданинг бузилишини санаб чиқдим. Бу сўз эркинлигининг бузилиши, цензура тақиқлангани ҳақидаги қонунларда ўз аксини топган», — деган Загородний.
Унинг сўзларига кўра, Зеленскийнинг фармони журналистларни ишлаш ва касбий бурчини бажариш ҳуқуқидан маҳрум қилади.
Аввалроқ Қрим ҳукумати Украина президентини коммунал тўловлар бўйича қарздорлик учун судга бериши хақида хабар берилганди. Шунингдек, Зеленский мамлакат қонунларидан бирини бузгани айтилган.
