ДХХ Бекобод ҳокимлиги бош мутахассисини 128 минг доллар пора олаётганда ушлади
Ҳокимлик масъули боғча биносини хусусийлаштиришга ёрдам беришини айтган
Давлат хавфсизлик хизматининг Тошкент вилояти бўйича бошқармаси Бекобод шаҳар ҳокимлигининг бош мутахассисини ўзганинг ишончига кириб, 128 минг доллар олаётган вақтида ушлади. Бу ҳақда ЎзА хабар берди.
Маълум бўлишича, вилоят прокуратураси ва иқтисодий жиноятларга қарши курашиш департаментининг ҳудудий бошқармаси ходимлари томонидан ўтказилган тезкор тадбирда Бекобод шаҳар ҳокимлигининг бош мутахассиси ўзганинг ишончига кириб, муқаддам бир неча бор судланган қариндоши билан биргаликда ундан ноқонуний равишда 128 минг доллар олган вақтида ушланган.
Аниқланишича, ҳокимлик вакили ушбу пул маблағи эвазига мактабгача таълим муасссаси биносини хусусийлаштириб олишда ва шаҳар ҳудудидан 1 гектар ер майдони ажратилишида ёрдам беришни ваъда қилган.
Шунингдек, Самарқанд вилояти Ургут туманидаги узум етиштиришга ихтисослашган фермер хўжалигининг 20 сотих ер майдонидан ижара асосида фойдаланиб келаётган фуқаро ушбу ернинг 10 сотихини бошқа бир фуқаро номига расмийлаштириб беришни ваъда қилиб, эвазига ундан 12 минг доллар олган вақтида ДХХ ва Бош прокуратура ҳузуридаги департаментнинг ҳудудий бошқармалари ходимлари томонидан ушланган.
Аввалроқ Давлат хавфсизлик хизмати Тошкент, Сирдарё, Наманган ва Самарқанд вилоятларида ер майдонларини ноқонуний сотиш ҳолатларига чек қўйгани ҳақида хабар берилганди.
