Абдулазиз Комилов 30 декабрь куни Ўзбекистоннинг хориждаги элчилари, консуллик муассасалари раҳбарлари ва халқаро ташкилотлар ҳузуридаги мамлакатнинг доимий вакиллари иштирокида Ташқи ишлар вазирлиги ҳайъат мажлисини ўтказди. Бу ҳақда вазирлик ахборот хизмати хабар берди.

Таъкидланишича, учрашув давомида вазирлик ва дипломатик ваколатхоналарнинг 2021 йилдаги фаолияти якуни кўриб чиқилди, 2022 йилга мўлжалланган устувор вазифалар белгилаб олиниб, аниқ топшириқлар берилган.

Шунингдек, Ўзбекистон Ташқи сиёсий фаолиятининг янги концепцияси лойиҳаси муҳокама қилинган. Иқтисодий дипломатия масалаларига, жумладан, дипломатик миссиялар раҳбарларининг жойлардаги вазиятни ўрганиш мақсадида Ўзбекистон вилоятларига амалга оширган сафарлари, савдо-иқтисодий соҳадаги лойиҳаларни муҳокама қилиш ва амалга ошириш учун вазирлик ва идораларда ўтказган учрашувларининг натижаларига алоҳида эътибор қаратилган.

Тадбир доирасида Шавкат Мирзиёевнинг фармони билан юксак давлат мукофотига сазовор бўлган Ўзбекистоннинг Тожикистондаги элчиси Эргаш Шаисматовга «Дўстлик» орденини топшириш маросими бўлиб ўтган. Учрашувда ТИВ ҳайъати аъзолари, Вазирлик бўлинмалари ва тасарруфидаги ташкилотлар раҳбарлари ҳамда масъул ходимлари ҳам иштирок этган.

Эслатиб ўтамиз, Шавкат Мирзиёев 27 декабрь куни хорижий давлатларнинг Ўзбекистонга янги тайинланган элчиларидан ишонч ёрлиқларини қабул қилиб олганди. Президент учрашув давомида Ташқи сиёсий фаолияти концепцияси янги таҳрирда қабул қилинишини маълум қилганди.