Пекин университети олимлари кенг кўламли тадқиқот ўтказиб, коронавирусни аломатларсиз ўтказаётганлар аввал ўйланганидан кўра кенг тарқалган бўлиши мумкинлигини аниқлади. Бу ҳақда «JAMA Network Open» хабар берди.

Фото: «Reuters»

Маълум қилинишича, мутахассислар Европа, Шимолий Америка ва Осиёда ўтказилган 95 та тадқиқотнинг кенг кўламли мета-таҳлилини ўтказган. Уларда жами 30 миллион киши иштирок этган.

Унга кўра, қариялар уйларида яшовчи кексалар ва у ерда ишловчи ходимлар ўртасида инфекцияга чалиниш ҳолатларининг 39,7 фоизи аломатларсиз бўлган, тиббиёт ходимлари ва касалхонадаги беморларда эса бу кўрсаткич тахминан 30 фоизни ташкил этган.

Қайд этилишича, касалликнинг аломатларсиз кечиши ҳомиладор аёллар, самолётда саёҳат қилишни яхши кўрадиганлар, шунингдек, круизларда дам олишни афзал кўрганларда ҳам кузатилган. Ушбу гуруҳлар орасида одамларнинг тахминан 50 фоизи коронавирусни аломатларсиз ўтказган.

Аввалроқ хитойлик олимлар ковиднинг қанча аломатларсиз ташувчиси борлигини аниқлаганди. Шунингдек, Руминияда коронавируснинг вакцина таъсирига қарши тура оладиган штами аниқлангани маълум қилинган.