Наманган вилояти Чуст туманида 26 декабрь куни «Жигули» йўлни кесиб ўтаётган 20 ёшли аёлни уриб юборди. Бу ҳақда вилоят Ички ишлар бошқармаси ахборот хизмати «Bugun.uz»га хабар берди.

Маълум бўлишича, воқеа соат 18:00 атрофида туманнинг Зарафшон МФЙ ҳудудида содир бўлган. Аниқланишича, 37 ёшли ҳайдовчи «Жигули» (ВАЗ-2103) автомашинасида кетаётиб, йўлни кесиб ўтаётган чустлик 20 ёшли аёлни уриб юборган.

Оқибатда пиёда олган тан жароҳати сабаб шифохонада вафот этган. Шунингдек, йўл-транспорт ҳодисаси содир бўлганда ҳайдовчи автомобилни ҳеч қандай ҳужжатларсиз бошқаргани аниқланган.

Мазкур ҳолат юзасидан Чуст туман ички ишлар бўлими ҳузуридаги тергов бўлими томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган.

Аввалроқ Тошкентда автобус йўлнинг белгиланмаган қисмидан ўтаётган пиёдани уриб юборганди. Аниқланишича, 31 ёшли Т.Ж. бошқарувидаги 72-сонли йўналиш автобуси йўлнинг белгиланмаган қисмидан ўтаётган пиёда Т.У.ни уриб юборган. Оқибатда жабрланувчи олган жароҳатлари билан воқеа жойида ҳалок бўлган.