Қримнинг Евпатория шаҳри яқинидаги Қора денгиз сувлари сариқ рангга кирди. Бу ҳақда Россиянинг «National Geographic» нашри хабар берди.

Фото: «Anymaker»

Маълум қилинишича, денгиз тасвирини эълон қилган шахс сув ранги аслида у қадар ёрқин эмаслигини айтган. У видео график жиҳатдан таҳрирланганини қайд этган. Бироқ сув майдони ҳақиқатан ҳам «сариқ рангга айлангани» айтилган.

Олимларнинг таъкидлашича, бу ғайриоддий ҳодиса эмас ва ваҳима қилишнинг ҳеч қандай сабаби йўқ. Қрим Фанлар академияси президенти, эколог Виктор Тарасенко соҳилнинг айнан мана шу қисми «Қрим олтин қумлари» номини олганини эслаган. Жумладан, у олтин таркибидаги лой сабабли сув шундай тусга кирганини айтган.

Таъкидлнаишича, шу кунларда Қримда кучли ёмғир кузатилиб, шамол тезлиги секундига 25 метрни ташкил қилмоқда. Бунинг натижасида чўкинди жинслар сув остидан кўтарилиб, қирғоққа ювилмоқда. Бўрон пасайганда чўкиндилар сув тубига тушиши ва денгиз ўз рангига қайтиши айтилган. Бир неча йил олдин худди шу каби манзара Севастополда ҳам кузатилган. Унинг юзага келиш сабаби бир хил бўлган. Айни пайтда сариқ сув техноген офатлар сабаб ҳам бўлиши мумкин. Жумладан, мазкур ҳолат бир неча йил олдин АҚШнинг Колорадо штатида содир бўлган.

Аввалроқ Иорданиядаги кўллардан бири қизил рангга ва Қора денгизнинг Россия соҳилларига яқин қисми яшил тусга киргани маълум қилинган.