Афғонистон Ислом Амирлиги расмийлари армияга аёллар қандай ҳолатда олинишини маълум қилди. Бу ҳақда «Khaama Press» хабар берди.

«Толибон» ҳаракати матбуот котиби Забиҳуллоҳ Мужоҳиднинг айтишича, ҳаракат ўзининг бўлажак армияси таркибида худкуш-террорчилардан иборат махсус батальон яратади. Улар Мудофаа вазирлиги қошида фаолият юритиб, махсус операцияларда қатнашади.

«Толибон» армияга аёллар ва собиқ зобитлар эҳтиёждан келиб чиқиб ёлланишини, олдинги афғон армияси мутахассислари ҳам бўлажак армия таркибига киришини айтган. Жумладан, собиқ армия таркибида аёллар ҳам фаолият олиб борган.

Маълумот учун, Ислом Амирлиги тўлиқ жиҳозланган 100 минг кишилик армия тузиш устида иш олиб бормоқда. Аввалроқ ҳаракат Афғонистоннинг Тожикистон билан шимолий чегарасига худкуш террорчиларни жойлаштиргани  ҳақида хабарлар тарқалган, аммо бу расман тасдиқланмаган. Худкуш террорчилар «Толибон»нинг сўнгги 20 йил ичида америкаликлар ва афғон хавфсизлик кучларига қарши энг муваффақиятли усулларидан бири бўлган.

Аввалроқ «Толибон» ҳаракати аёлларга нисбатан яна бир тақиқ жорий этгани ва афғон аёллари қандай либос кийиши кераклигини айтгани ҳақида хабар берилган.