2021 йилнинг 12 ойи давомида Президент виртуал қабулхонаси ва Халқ қабулхоналарига 1 миллион 600 мингдан ортиқ мурожаат келиб тушди. Бу ҳақда «Bugun.uz»га қабулхона матбуот хизмати хабар берди.

Таъкидланишича, бу бир ойда ўртача 133 минг, кунига ўртача 4,4 мингдан зиёд мурожаат дегани. Таҳлилларга кўра, мурожаатларнинг 53 фоизи ёки 865 мингтаси ижобий ҳал этилган.

2021 йилнинг фақатгина ноябрь ойида Виртуал қабулхона тизимига 133 мингта мурожаат келиб тушган. 2021 йилда келиб тушган мурожаатлар орасида ижтимоий нафақалар масаласи етакчилик қилган — 190 мингта мурожаат. Иш билан таъминлаш йўналишида 96 мингта, мажбурий ижро фаолияти, алимент ва қарз суммаларини ундириш – 94 мингта, банк кредитлари – 77 мингта, уй-жой билан таъминлаш – 68 мингта мурожаат тушган. Шунингдек, газ, электр энергияси таъминоти, ичимлик суви таъминоти ва меҳнатга ҳақ тўлаш билан боғлиқ масалалар етакчи мавзулар бўлган.

Таҳлилларга кўра, 2021 йилда энг кўп мурожаатлар Қашқадарё вилояти ҳиссасига тўғри келди – 197 мингта. Сурхондарё вилоятидан 181 мингта мурожаат келиб тушган. Тошкент шаҳридан эса 165 мингта мурожаат қабул қилинган. Шунингдек, Тошкент (155 минг), Самарқанд (150 минг) ва Фарғона (145 минг) вилоятларидан ҳам кўплаб мурожаатлар йўлланган.

Бу тизимда мурожаатларни вазирлик ва идоралар кесимида ҳам таҳлил қилиш ва шундан келиб чиққан ҳолда ислоҳотларни ушбу вазирлик ва идораларга томон йўналтириш имконияти ҳам мавжуд. Масалан, 2021 йилда энг кўп мурожаатлар Молия вазирлигига оид бўлган. 173 минг фуқаро шу йўналишда мурожаат қилган. Шунингдек, Ички ишлар вазирлигига тегишли 122 мингта, Бандлик ва меҳнат муносабатлари вазирлигига тааллуқли 105 мингта мурожаат келиб тушганлиги фикрларимизнинг рўй-рост тасдиғи ҳисобланади. Бундан ташқари, худди шу даврда Мажбурий ижро бюроси, Бош прокуратура, Олий суд ҳамда Марказий банк ва тижорат банклари тизимига тааллуқли мурожаатлар сони ҳам анча катта бўлган.

2021 йилда вилоят, туман ва шаҳарлар секторлари раҳбарлари томонидан Халқ қабулхоналари билан ҳамкорликда 31 927 та сайёр оммавий қабуллар ўтказилди. Уларда 223 412 нафар фуқаронинг мурожаати бўйича 230 446 та масалалари тингланди. Шундан 130 533 та, яъни 56,6 фоиз масалалар қаноатлантирилди.

Шу кунгача ҳал этилмаган аҳоли мурожаатларини қайта ўрганиш ишларига киришилди. Шу тариқа, қисқа вақт ичида 651 мингдан зиёд мурожаат қайта кўриб чиқилиб, уларнинг 78 фоизи ёки 506 минг 536 тасини ижобий ҳал этишга эришилди.