Қондаги қанд миқдорининг коронавирусга таъсири баҳоланди
Олимлар буни аниқлаш учун 400 мингта тадқиқотни ўрганиб чиққан
Қондаги юқори қанд миқдори коронавирусга чалинган бемор ўпкасининг зарарланишига ва тромбоз ҳолатига олиб келади. Бу ҳақда «Cursorinfo» хабар берди.
Швейцариянинг «Blue Brain» тадқиқот лойиҳаси юз минглаб коронавирус тадқиқотларини таҳлил қилган нейрон тармоқ яратган. Тадқиқотчилар нима учун баъзи беморлар ковидга симптомсиз чалинса, бошқаларда эса касаллик оғир кечишини таҳлил қилган. Шу тариқа улар пандемия даврида коронавирус бўйича ўтказган 400 мингта тадқиқотни кўздан кечириб, уларнинг деярли учдан бир қисмининг тўлиқ матнини чоп этган.
«Blue Brain» жамоаси энг кўп келтирилган биологик ўзгарувчи глюкоза метаболизми эканини аниқлаган. Тадқиқотчилар респиратор касалликлар ва коронавирус контекстида қондаги қанд миқдорини ўрганган. Улар коронавирус инфекциясининг турли босқичида қондаги глюкоза даражасининг ролини ва касалликнинг кечишини ўрганишга муваффақ бўлган. Маълум бўлишича, юқори глюкоза даражаси ковиднинг янада оғир кечиши билан боғлиқ.
Аввалроқ ковидга қарши кураша оладиган қон гуруҳлари аниқланганди. Шунингдек, кимлар бир вақтнинг ўзида грипп ва ковидга чалиниши айтилган.
