Тожикистон президенти Эмомали Раҳмон 10 январь, душанба куни КХШТ кенгаши йиғилишида тожик-афғон чегарасидаги вазият кундан кунга мураккаблашаётганини маълум қилди. Бу ҳақда «НТВ» хабар берди.

Маълум қилинишича, Раҳмон Афғонистон атрофида хавфсизлик камарини яратиш зарур деб ҳисоблаган. Давлат раҳбари ИШИД жангарилари Афғонистон ҳудудида ўз позициясини мустаҳкамлаётганига эътибор қаратиб,  КХШТ тақиқланган террорчилик ташкилотларининг ягона рўйхатини шакллантириши зарурлигини таъкидлаган.

«Мен террорчиларнинг ватани, дини йўқлиги, улар қаерда бўлмасин, йўқ қилиниши кераклигига ишонаман», — дейди Тожикистон президенти.

Шунингдек, у Қозоғистондаги вазиятга муносабат билдириб, Қозоғистон расмийларининг мамлакатдаги вазиятни нормаллаштириш ва тартибни тиклаш бўйича кўраётган чора-тадбирларини тўлиқ қўллаб-қувватлаган.

«Қозоғистондаги воқеалар терроризм ва экстремизм, диний радикализм ва трансмиллий уюшган жиноятчиликка қарши курашиш бўйича биргаликдаги комплекс фаолиятимизни кучайтириш зарурлигини яна бир бор тасдиқлайди», — деган у.

Аввалроқ Тожикистон президенти Афғонистонга қандай ёрдам беришини айтганди. Шунингдек, у мамлакат қайси соҳада заифлигини очиқлаганди.