Хитойнинг «Yutu 2» қурилмаси 2021 йилнинг ноябрь ойида Ойда «кулба» кўринишидаги объектни аниқлаганди. Эндиликда қурилма мазкур объектга яқинлашиб, унинг нима эканига ойдинлик киритди. Бу ҳақда «The New York Times» хабар берди.

Маълум қилинишича, дастлаб «кулба» акс этган расм ҳиралиги учун кўплаб назарияларни келтириб чиқарган. Ернинг табиий сунъий йўлдошидаги объект «сирли кулба» ёки «ой куби» деб номаланган. Баъзилар ҳатто бу Артур Кларкнинг 2001 йилдаги «Космик Одиссей» фильмидаги монолит каби ўзга сайёраликлар томонидан қолдирилган нарса деб ишонган.

Объект топилгандан сўнг қурилма уни батафсилроқ текшириш учун юборилган, бироқ бу жойга етиб бориш учун бир неча ҳафта керак бўлган. Хитой 7 январь куни эса сирли топилма экспертизаси натижалари ҳақидаги маълумотларни эълон қилган. Унга кўра, сирли жисмнинг тош экани, унинг «кулба» сифатида акс этишига қурилма камерасига тушган соя сабаб бўлгани айтилган.

Шу билан бирга, Ердаги мазкур қурилманинг масофавий операторларидан бири бу тош қуённи эслатиши, яқин атрофдаги бошқа тош эса бироз сабзига ўхшашлигини таъкидлаган. Айни пайтда Хитойнинг Ойдаги қурилмаси деярли 1000 метр масофани босиб ўтган.

Аввалроқ NASA марсоходи тарихда илк бор Қизил сайёра атмосферасидан кислород ажратиб олганди. Шунингдек, Ойда ҳаракатланадиган автомобиль намойиш қилинганди.