Олий ва ўрта махсус таълим вазирлиги бош бошқарма бошлиғи Абдували Холиқов олийгоҳларда таълим жараёнлари онлайнга ўтказилмаслигини маълум қилди. Бу ҳақда у АОКАда 10 январь куни ўтказилган матбуот анжмунида айтди, дея хабар бермоқда «Bugun.uz» мухбири.

Фото: «Bugun.uz»

Қайд этилишича, Ўзбекистонда талаба ва ўқувчилар учун қишки таътил муддати 24 январгача узайтирилган. Бу ҳолат коронавируснинг «омикрон» штами аниқланиши билан боғлиқ эмаслиги таъкидланди.

«24 январдан кейин таълим жараёнлари онлайн форматга ўтказилмайди. Якуний назорат имтиҳонлари ўз вақтида бўлиб ўтади», — деди Абдували Холиқов.

Маълумот ўрнида, талабалар учун қишки таътил муддати 6 январь куни узайтирилгани эълон қилинганди. Бунинг сабаби этиб, ректорлар, проректорлар, деканлар ва молия масалаларига масъуллар учун касбий маҳоратини ошириш, янгича тартибда ишлашни бошлаш мақсадида амалий семинар-тренинглар ташкил этилиши қайд этилган.

Эслатиб ўтамиз, аввалроқ Халқ таълими вазирлиги мактабларда ҳам қишки таътил муддати 24 январга қадар узайтирилганини маълум қилганди. Бироқ бу ҳолат ўқитувчиларнинг маошига таъсир қилмаслиги таъкидланган.