Туркманистон президенти Гурбангули Бердимуҳамедов Хавфсизлик кенгашининг кенгайтирилган йиғилишида интернет устидан назоратни кучайтириш ва мамлакатда конституциявий қонунчиликка зарар етказувчи материалларни тарқатувчи манбалар ишини чеклашни буюрди. Бу ҳақда «Коммерсантъ» хабар берди.

Маълум қилинишича, президент мазкур топшириқ юзасидан Миллий хавфсизлик вазири Гурбанмират Аннаевга қатор топшириқлар берган.

«Интернетни талабларга мувофиқ назорат қилишимиз керак. Мамлакатимиз ҳудудида давлатимизнинг конституциявий тузумига зарар етказувчи, жамиятга қарши қаратилган, воқеликни бузиб кўрсатувчи, терроризм, экстремизм, миллатчилик ва бошқа ноқонуний хатти-ҳаракатларни тарғиб қилувчи маълумотларни тарқатувчи интернет манбаларининг фаолиятини аниқлаш ва чеклаш зарур», — дейди Туркманистон президенти.

Миллий хавфсизлик вазирлиги «айниқса, шахслар ёки гуруҳлар томонидан жамоат хавфсизлигини бузишга, шунингдек, оммавий тартибсизликларга қарши курашиш бўйича тезкор ишларни кучайтириши керак», — дея қўшимча қилган у.

Аввалроқ Туркманистон президенти истеъфога чиқиши мумкинлиги ва унинг ўғли Тошкентга келиши хабар қилинган.