Маълум бўлишича, Ўзбекистон ҳудудида террористик жиноятларни содир этгани учун 23 йилдан буён қидирувда бўлган У.С. хорижда ушланиб, олиб келинди. Тошкент вилоятида туғилган 55 ёшли эркак 1998 йилда Чеченистонда жанговар тайёргарликдан ўтиб, 1999 йилнинг 16 февраль куни Тошкент шаҳрида амалга оширилган қўпорувчилик ҳаракатларида иштирок этган ва март ойида айланма йўллар орқали хорижга чиқиб кетган.

Қайд этилишича,  у иорданиялик Амир Хаттоб томонидан Чеченистонда ташкил этилган жангариларни тайёрлаш лагерларига «Туркистон ислом ҳаракати» халқаро террористик ташкилотининг Ўзбекистондан бўлган аъзоларини жўнатиш билан ҳам шуғулланган.

Таъкидланишича, эркак 2001 йилнинг ноябрь ойида бошқа шахснинг номига расмийлаштирилган сохта ҳужжатлар асосида МДҲга аъзо давлатлардан бирининг фуқаролигини олиб, ўша мамлакат ҳудудида яшириниб юрган. Давлат хавфсизлик хизматининг чет эл махсус хизматлари билан ҳамкорликда олиб борган тезкор-қидирув тадбирлари давомида У.С. ҳибсга олинган. Ҳозирда унга нисбатан қўзғатилган жиноят иши доирасида тергов ҳаракатлари олиб борилмоқда.

Аввалроқ Самарқандда «Ҳизб ут-таҳрир»нинг 3 нафар аъзоси қўлга олингани ва Сирдарёда террористик гуруҳга аъзо бўлган 8 нафар эркак ушлангани хабар қилинган. Шунингдек, Хоразмда террористик гуруҳ фаолиятига чек қўйилганди.